Murtudo yahii waynaaki, yawnaaki

Kaaw Tokosel Tuure-Jowol


So maayde waajaaki holi ko waajoto?
Dum ko Murtuɗo Joob wiyno
Somi wirtiima genaale, mi miijo ɓe kam ceerti e penaale,joobinooɗo fof maa male,sabu alaa ko yoɓetee so wonaa baɗle.Dum kadi ko Murtuɗo Joob yimno.
Sabu gorko jom tenngaade ina annduno
aduna wonaa so wonaa mehre.
Alaa ko heddoto so wonaa golle e baɗle.
Amo annduno mo aduna fuunti fof ma fuuynu.
Kadi mo aduna jalni fof maa woynu.
Ko kanko laatino Gawlo miskineeɓe.
ko kanko wiyno ko min murtuBe kono min ngonaa ɓurtuɓe.
Ko kanko kadi wiyno ɗemngal ko fittaandu lenyol,
ɗemngal ko daabaa pinal.Ko kanko wiyno Alaa min caltiima.
Ko kanko wiyno, holi no leydi amnorto?
holi no leydi mahorto?
taw ɓe ko laamotooɓe, ɓe ko laamateeɓe,
ɓe ko waɗɗotooɓe, Be ko waɗɗateeɓe.
Ko kanko wiyno en caltiima e muritani
laamu puccu e baɗɗotooɗo e ndi leydi
Ko kanko wiyno en caltiima laamu,
"poɓɓee, poɓɓee, pokkitee". Ko kanko wonno mbir wuro e ladde,
ko kanko tigi woni koɗo subaka
jom wuro naange e hoore.
Golle e balle Baaba lenyol hannde mi haala
kono hay so en nyalli en mbaali en ngaynata.
Bure makko e ɓure nelaaɓe ngoɗɗondiraani.
maɓe mbiy en ɓurtinii maa en ngoofii
kono kaalɗen ko, ko goonga ina woodi.
Lenyol fof e nelaaɓe mum e waliyaaɓe mum,
Murtuɗo wonnoo nulaaɗo fulɓe Afrik mum.
Ko kanko wonno jannkiniiɗo mo hono mum heewaani
giɗo lenyol, giYum kala Binngel ngenndi. O mawnikinaaki o haawtaaki o hiiwtaaki.
Kala ko o annduno o jeyno o rennda.
Ko kanko tigi nawdi golle e haala.
O jaɓi wiyeede huywere lenyol
ngam yooltude e momtude gonɗi lenyol
ngam yaltinde e niɓɓe majjere e humambinndaagal.

Ko kanko wonno mo alaa ko yiɗi,
mo yiɗaa won´de nde lenyol makko wonaani.
Sabu ko o palkisiiɗo jawdi aduna no boloŋaaji.
O ndaraani wutte, o ardinaani wuttulo.
O wutti fenaande o aawi manoore.
Lenyol men goongɗinɗo,
goonga tan kaɓanteeɗo.
Mo Daminaaki waɗde mo hulaani.
Ko o ceerno mo saggitaake ,
ko o naalannke. Ko o yimiyannke,
ko o miijiyanke, ko o haaliyannke,
ko o daariyannke, ko o jalniiɗo,
ko o jalnoowo, ko o jeewtoowo,
kala ɗo o woni nyiire ina Saaɗa,
nofuru ina welto, yitere ina jannga, junngo ina foɓɓa.
Murtuɗo taaniragel Hammadi ngunndo to mbaany sammba
aan woni Hammadi wuro e ladde,
lenyol men fof ceeɗtiima.
Waɗde poɓɓee, poɓɓee, poɓɓee, no keewnoɗaa wiyde. Murtuɗo ko jom fiɓnde, o wuuri dariiɗo, o maayii dariiɗo. Mbabba ndimaagu e kaaraysiwaagu. ko o sofaa mo fooftotaako, mo gantotaako, mo yoɓaaki no ɗum fotantami, mo naamnaaki no ɗum foti. Muritani woyii kadi maa woye lebbi e duuBi sabu ko baasal mawngal ngal alaa jaasi. Pulaar waasii, fulɓe njaakii. Bawdi pusii, tabbaleeji ceekii, gure njeewii. Murtudo mo alaa galle so wonaa leydi mum.Mo alaa suudu saka joom suudu mumsabu yarlitanaade lenyol mum. Murtuɗo honoma weeɓaani. A woppi baayeeji, a woppii hesniiBe, a woppi jom deedi e hulɓe deedi e nder ladde tulaa helaa, ladde pobbi e baroode.A woppi min e nder maayo luggo, ɗo nguurndam liɗɗi, mbawngu kala toɗɗo mbaawaangu. Murtuɗo a yahii nde fotaani sabu ko hannde lenyol ngol soklu ma. Ko hannde hare nde tuuyama. Kono binndi ma e banndaaji ma amin moofti.Mamin car, mamin caak,mamin njayyin , mamin lollin,seydi Joob hare koko jokki.Innde ma wontanii min jimol. Golle ma ngontanii min daartol,Haala ma wontanii min lohol,Lowre ma wontanii min kiwal,A haBiima laamu kolonyaal,A haBiima laamu kiiBal,A haBima laamu fetel. A firtaani aadi. A jamfaaki ngenndi.Eskeey ma Murtudo! taare ma ngenndiyaanke!Aan dey koa dokke kadi koa jom dokke. A mawninaani kufune, a yuufnaani becce. Murtudo a murtinii min, waɗde min njarii tufam ngenndiyankaagal min manndilii. Min luutaama yeewtere ma hannde e ɗii calɗi lenyol ɗi tawtoyɗaa wirto ɓennaa.Wallaahi maɓe teerte, ɓe njaɓɓiroma ko ɓuri welde e jimDi so haayyooy ma, Daas wiyi.Jiggo Tafsiiru, Abubakri kaaliidu, Mustafa Boli, Ibiraahima Kaasum, Tijjaani Aaan, Bah Seydi,Yero Dooro Jallo, Kebe Muusaa, Saydu Sih,Saar Aamadu, Abdul Qudduus , Teen YuusufiMurtudo arii e mon, lefol goonga piileemo woto ko heddii. Nde yeewtere weli heɗaade kono yahBe ngoɗɗii. yeewtere sahodinBe, yeewtere fasniiɓe aadi. Ma haalanɓe wonde hare ina nde jokki. Won jamfiiɓe noon, won hortiiBe kadikono won jokkuBe, won dariiBe haa jooni pooftaaki.Flam men haa jooni lewlewndu nyiifaani. Dekalem dikkiima nder leydi, wammbii hare leydi. WuumnooBe ngumtii, muumBe kay cowlii, wuumɓe laarii, Ibraa yimi. Pulaar saakiima nder leydi, Fuuta men feertii. AnyBe men tikki. Murtuɗo a woni hammadi wuro e leydi. Maayde ko aan suusi reedu.Mate a anndaa ko mbir keelniiɗo liɓɗa,kono o folaani, o ganndo nawii raay.Sabu e ɓerɗe amen e mijjooji amen koɗɗo. Murtuɗo wirni kono haa bada o maayata. Yo Geno yurme yaafoma. yo juuɗe moyye njaɓɓoma.Min ɓeydiima murtude waɗde Hare men ina jokki.
Kaaw Tokosel Tuure mo Jowol.
Stockholm - Nyande 13-06-2009